2 நிமிடங்கள் அமைதியாக வாசிக்கப்பட்ட இறைவார்த்தையின் வழியாக இறைவன் நம்மோடு பேசுவதை உணர முயல்வோம்.

உள்ளத்தைத் தொட்ட வார்த்தையைத் தியானித்து, பின் அந்த இறைவார்த்தையை அல்லது சொற்றொடரை ஜெப மனநிலையோடு அனைவருக்கும் கேட்கும்படியாக மூன்று முறை அறிக்கையிடுதல்.

உள்ளத்தைத் தொட்ட இறைவார்த்தை வழியாக இறைவன் தனக்கு உணர்த்தியதை தங்கள் வாழ்க்கையில் நடந்த அனுபவங்களோடு இணைத்துப் பகிர்தல் வேண்டும்.

அனைவரும் இணைந்து வாழ்வின் வார்த்தையை முடிவு செய்து எல்லோரும் இணைந்து இரண்டு முறை சொல்வோம். 

1. சென்ற அன்பிய கூட்டத்தில் எடுத்த வாழ்வின் வார்த்தை பயன்படுத்திய விதம் பற்றிய பகிர்வு செய்தல்.
2. சென்ற முறை தெரிந்தெடுத்த செயல்திட்டத்தைச் (பணியை) செயல்படுத்திய விதம் பற்றிய பகிர்வு அவசியம்.
3. இதில் சிறப்பானது என்ன? இன்னும் எவ்வாறு சிறப்பாக செய்திருக்கலாம்? என்பனவற்றை விவாதித்தல் நல்லது.
4. அறிவிப்புகள் - பங்கு, மறைமாவட்டம், சமூக சேவை, இன்னும் பிற செய்திகளைப் பற்றிய செய்திகள் அறிவித்தல்.

1. குழுவாக அல்லது தனிப்பட்ட விதத்தில் நற்செய்தி இன்று நம்மை செய்யச் சொல்லும் புதிய பணி என்ன? (இயேசுவுக்குப் பிரியமானது) என்ன செயல்பாடு? யார்? யார்? எங்கு? எப்படி? செய்வது? போன்ற தெளிவுகளுடன் திட்டமிடுதல் வேண்டும்.
2. செய்யவிருக்கும் செயல்பாடு அவரவர் திறமைக்கேற்ப பகிர்ந்து கொடுக்க வேண்டும்.
3. எல்லாரும் செயல்பாட்டில் பங்கெடுக்க வேண்டும். 

1. திருச்சபைக்காக: 
ஞானமென்னும் அருட்கொடைகளைச் சாலமோனுக்குக் கொடுத்த எம் இறைவா! எம் திருத்தந்தை, ஆயர்கள், அருட்பணியாளர்கள், அருட்சகோதரிகள், இறைமக்களாகிய நாங்கள் அனைவரும் கடவுளின் ஆசீர் பெற்றவர் என்பதை நாங்கள் உணர அல்லது பிறர்முன் துலங்க, நாங்கள் எங்கள் முழு ஆற்றலையும், திறன்களையும் பயன்படுத்த வேண்டிய வரங்களைத் தர வேண்டுமென்று இறைவா உம்மை மன்றாடுகிறோம்.

2. நாட்டு தலைவர்களுக்காக: 
உறவுடன் வாழ ஒவ்வொருவரையும் அழைக்கும் உன்னத இறைவா! எங்கள் நாட்டுத் தலைவர்கள் அனைவரும் தங்களை அழைத்துத் தங்களுக்குப் பணி நியமனம் செய்த அரசின் நோக்கத்துக்காக விசுவாசமாய் இருக்கும் விதத்தில் சிறந்த திட்டமிடுதலுடன் பாகுபாடின்றிப் பணியாற்றி மக்களின் தேவைகளைப் பூர்த்திச் செய்து நற்பெயர் ஈட்ட முயல வேண்டுமென்று இறைவா உம்மை மன்றாடுகிறோம். 

3. சமுதாயத்திற்காக: 
அகமுவந்தழைக்கும் அன்புத் தந்தையே இறைவா! இயேசு கிறிஸ்துவிடம் புன்னகையோடு வந்தவர் அனைவரும் முகவாட்டத்தோடு செல்வதில்லை என்ற நிலையும், தன்னலமற்ற சேவையால் இம்மையிலும் மறுமையிலும் எல்லாச் செயல்களைப் பெற்றவர்களாய் வளம் வரும் வரம் வேண்டியும், இறையாட்சிப் பணிகளை ஏற்ற காலத்தில், ஏற்ற இடத்தில், ஏற்ற முறையில் ஆற்றவேண்டிய வரத்தையும் நல்கிட வேண்டுமென்று இறைவா உம்மை மன்றாடுகிறோம். 

4. அன்பியங்களுக்காக: 
உறவின் ஊற்றே உன்னத இறைவா! எங்கள் பங்கில் உள்ள எல்லா அன்பியக் குடும்பங்களிலும் செபமாலை பக்தி முயற்சி வளரவும், அன்னை மரியாளின் பரிந்துரையைப் பெற்று, எங்கள் பங்கைச் சேர்ந்த எல்லா நிறுவனங்களும், பக்தச் சபைகளும் வளர்ந்து சிறந்தப் பலனை வெளிப்படுத்த வேண்டுமென்று உண்மை மன்றாடுகின்றோம்.

5. நம் குடும்பங்களுக்காக: 
என்றும் எங்களை நிறைவாய் ஆசீர்வதிக்கும் எம் இறைவா! இன்று நாங்கள் ஞானம் என்ற உம் கொடையைப் பெற்று இயேசு கிறிஸ்துவை எம்நிலைவாழ்வாக பெறவும், நீ ஆசீர்வதிக்கப்படுவாய்! என்று தினமும் நம் கண்முன் கொண்டிருக்கும் இறைவார்த்தை, நாங்களும் மற்றவர்களை ஆசீர்வதிக்க வேண்டும் என்று எங்களை தூண்டவும், இறைவார்த்தையால் ஆசீர்பெற்ற வாழ்வை வாழவும் தர வேண்டி இறைவா உம்மை மன்றாடுகிறோம்.

அடுத்த கூட்டம் எங்கு? எப்போது? யார் வழி நடத்துவது என்று முடிவு செய்வோம்.

நிதி நிலை அறிக்கையை பொருளாளர் பகிர்ந்து கொள்வார்.
1. பழைய இருப்பு 
2. இன்றைய காணிக்கை 
3. மொத்த இருப்பு

முடிவில் அன்பியம் நடத்தும் வீட்டாருக்கு நன்றி செலுத்துதல். 

நலன்களின் ஊற்றே இறைவா, உம்மை போற்றுகின்றோம். உம்மை புகழ்கின்றோம். நீர் எங்களுக்கு பொழிந்து வரும் அருட்கொடைகளுக்காகவும், செய்துவரும் அனைத்து நன்மைகளுக்காகவும் உமக்கு நன்றி கூறுகின்றோம். 

அன்பின் தூய ஆவியானவரே! எங்களுடைய வலுவற்ற நிலையில் எங்களுக்குத் துணையாக வாரும். எதற்காக, எப்படி தந்தையிடம் வேண்டுவது என்று சொல் வடிவம் பெற முடியாத, எங்களுடைய பெருமூச்சுகளின் வாயிலாக தேவரீர் தாமே பரிந்து பேசும். எங்கள் அன்பியத்திலுள்ள ஒவ்வொரு குடும்பத்திலும் ஏற்படும் விருப்பு வெறுப்புகள், இன்ப - துன்பங்கள் அனைத்திலும், உமது வல்லமையால் நாங்கள் ஒற்றுமையாக வாழவும், ஒருவர் மற்றவருக்காக செபிக்கும் குடும்பங்களாகவும், வேதனை, சோதனை, துன்பங்கள், துயரங்கள் அனைத்தும் உமது திருச்சித்தம் என்றும் ஏற்றுக்கொள்ளும் மன நிலையையும், சக்தியையும் ஆறுதலையும் அருளும். 

நாங்கள் ஒருவர் ஒருவரை புரிந்து கொண்டு ஒருவர் மற்றவரின் இன்ப துன்பங்களில் பங்கெடுத்து, அரவணைத்து வாழும் அன்பு குடும்பங்களாக மாற்றியருளும். அன்பே உருவான இயேசுவே, மன வேதனை தரும் அனுபவங்களினாலும், தீராத நோய், ஏழ்மை, தனிமை, அகம்பாவம், பொறாமை, பகைமை உணர்வு இவைகளால் தாக்கப்பட்டு அமைதியின்றி வாழும் அன்பியக் குடும்பங்களை உமது திருப்பாதத்தில் சமர்ப்பிக்கின்றோம். உமது வல்லமையுள்ள திரு இரத்தத்தால் எங்களை தூய்மையாக்கி உமது சமாதானத்தை எங்களுக்கு அளித்து இறையன்பிலும், பிறர் அன்பிலும் நாங்கள் என்றும் வாழ அருள்புரியும். - ஆமென்.